بداية انا متأكدة ان الحب هو سبب كل حاجة بتحصل في الدنيا سواء خير او شر
لان انوا الحب كتير زي: حب النفس ..حب الامتلاك...حب الوطن...حب المنصب..حب الجنة....الي مالا نهاية
بس الحب اللي بتكلم علي حاليا
الحب بين الانهيار و الاستقرار
نظريتي مش جديدة ولا غريبة....بس بالرغم من كده 10% -30% اللي بيطبقوها من البشر علي ما اعتقد
الحب الذي يسبب الانهيار
هو الحب في الوقت الغير مناسب ...في المكان الغير مناسب....وتكتمل المأساه عندما نختار الشخص الغير مناسب...من اجل فقط ...الاستمتاع بشعور الحب!
كتير اوي بنلاقي اتنين مختلفين عن بعض تماما وبيتخانقوا في الاسبوع 63 مرة!
البنت عارفة كل عيوبه انه اناني وعايز يمتلكها و...
والولد عارف انها نكديه وبتغير زيادة عن اللزوم(هي كمان عايزة تمتلكه)
وانهم الاتنين مش متناسبين اجتماعيا ولا ثقافيا ولا اي حاجة....بس بمسمي الحب
قرروا انهم يخلوا الحب (الحكم ) الاول والاخير ... لقرار الزواج
وزي اي فيلم عربي رومانسي بكده ينتهي الفيلم!
النهاية
بس احنا هانكمل الفيلم وعشان نكمل سيناريو الفيلم ده ...للاسف لازم نطبق مقولة
( الحب حاجة..... والجواز حاجة تانية)
لانهم لما حبوا بعض رغم اختلافهم وخلافتهم
هي عايشة في بيت .... وهو عايش في بيت
فلما اتجوزا....هي منتظره تشوف حاجات احسن منه وهو كذلك......بس للاسف هما فعلا طلعوا لبعض اجمل حاجات فيهم وكمان زينوها واكيد الحاجات الاحسن كانت اكتر من الصفات اللي مش كويسة
لذلك للاسف
هما الاتنين هايخيب املهم في بعض....هي مابقتش بتوحشة زي الاول لانهم عايشين مع بعض , فنار الحب هديت خلاص !
هايبتدوا يفكروا ايه اساس جوازنا اللي الكل كان رافضه حتي عقلنا !
الحب استقر وبالعكس بقي يقل من كتر الخناقات التافهة زي.................. محطتش فرشة السنان مكانها ليــــــــــــــــــــه؟؟؟؟؟؟؟؟؟؟؟؟؟؟
مفيش مباديء كانوا متفقين فيها , مافيش حلم كانوا عايزين يوصلوا ليه مع بعض بعد الجواز ! ما فيش حتي هدوء
كل حاجة اتقلبت لملل !!!!!!!!
ادركوا حاجة مهمة جدا:
ان الحب في البداية هزم التفكير والعقل والمنطق...بس في النهاية الحب هزم نفسه !!!
طبقوا القصة دي علي الاف الاسر اللي كل يوم بنسمع انها اتفككت وحصل طلاق !
وبكده من حقي اقول:
لا اؤمن بالحب...الذي يسبب الانهيار
بس نظريتي لسه ماخلصتش...بالعكس لسه هاتبدأ
الحب شعور خفي...كتير مابنعرفش نتحكم فيه...بس متأكدة اننا نقدر نسيطر عليه
لانه يبدأ واحدة واحدة بالارتياح...واحنا بنطورة بالمراقبة:انك تراقب تصرفاته بأستمرار واكيد في تصرف هايعجبك...او ممكن تلاقي صفة من صفات شريك حياتك اللي عايزها مش شرط تكون الاولي !
وفي مشكلة خطيرة ممكن تحصل لازم نحافظ علي مشاعرنا بأي وسيلة ..لان ممكن نرتاح لحد ونراقبه مثلا لو ضايفه علي ال face book تفضل تراقبه وتتعلق بيه وهو في الاخر مش واخد باله منك !
في الوقت ده هانقولك :
هو انت مين اللي عمل كده فيك... مش انت ولا في حد غمي عنيك ؟؟؟
* المهم عايزة اوصل من كل ده: ان الحب القوي احنا لينا دخل فيه بنسبه 70%
*في حاجة تانية ممكن تؤدي للانهيار:
بنت كويسة تتخطب لواحد كويس بس هما الاتنين مختلفين ..عاملين زي المغناطيس + و + بيتنافروا بس رغم كده خايفة تسيبه عشان خايفة تدخل في تجربة تانية ممكن يكون احسن بكتير بس ممكن لأ ! في الحالة دي لازم تخرج من الاطار اللي هي فيه عشان الاستقرار النفسي علي الاقل.
الحـــــــــــــــــــــب ..... الاستقـــــــــــــــــرار
اكيد لو انسان شعاره:
(اريد حياة زوجية...لا يمكن هدمها)
الحب مش هايكون بداية...بس الارتياح النفسي والمودة والرحمة هايكونوا البداية
وهايكون هايكون في اساس قوي لبناء اسرة قوية
لما الانسان يختار شريك حياته لازم علي الاقل يكونوا عندهم نفس المباديء وعندهم حلم مؤمنين بيه عايزين يوصلوا ليه مع بعض....ممكن يكون الهدف انهم يطلعوا جيل مسلم قوي مؤمن بالله جيل زي صلاح الدين
في الحالة دي لو حبهم اتهز في يوم ... عندهم اساس قوي ابتدي منه حبهم .
وفي الحالة دي هما الاتنين اتخلقوا عشان يكونوا لبعض
قال الله تعالى: (وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجاً لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآياتٍ لِقَوْمٍ يَتَفَكَّرُونَ)[الروم:21
وعشان تكون حياة زوجية لا يمكن هدمها في مفهومين مهمين جدا:
1-شريـــــــك الحيـــــــــــاة
الحياة الزوجية مشاركة بين اتنين...ماينفعش البيت يقوم علي الراجل بس او المرأه بس... لازم يشتركوا مع بعض في كل صغيرة وكبيرة.
2-اصحـــــــــــاب
معني مهم جدا جدا جدا في الجواز...الزوجين قبل ما يحبوا بعض ...لازم يكونوا اصحاب (يعني وانا بختار شريك حياتي اشوف ينفع يكون صحابي ولا لأ ؟) يحكوا لبعض اسرارهم وكل حاجة ,تحكيله انها اتضايقت من التصرف الاخير اللي جوزها عمله"استعباط لذيذ يعني" ^_^
في طبعا قواعد كتير لبناء حياة زوجية قوية ...بس مش هاتكلم عنها المرة دي
وفي النهاية:
لا اؤمن بالحب كابداية....ولكن اؤمن بالارتياح النفسي والقبول العقلي والمودة والرحمة كابداية...لحياة سعيدة هادئة
ملحوظة: طبعا لكل قاعدة شواذ....بس نتوكل علي الله وناخد بالاسباب
اتمنى لنا جميعا الخير يارب العالمين
المشاركات
