اسال مجرب .. للمستجدين فى كليات دمنهور

السلام عليكم .,


فى الاول الف مبروك عالنجاح واهلا بيك معانا واهلا بلقبك الجديد الباشمحاسب
فى الاول وقبل مادخل فى الموضوع تنسى بقى الثانوى والنظام ده انت دلوقتى بقيت طالب جامعى فمبرووك









دلوقتى بقى يا سيدى سواء سمعت الكلام ده من حد قبل كده او اول مرة حاتسمعه فاعرف انى مجرب حاجات كتيرة منه وانك حتستفيد ان شاء الله

ماللى حقوله دلوقتى , وانا فاكر كويس جدا ايام ما خلصت الثانوى وقدمت فكلية التجارة وفاكر كل حاجة مريت بيها يعنى من لغبطه وتجارب وحاجات

من دى وعارف كويس الحاجات اللى معظم الشباب اللى داخليين عالكلية بيفكروا فيها وحبيت اعرضلكم الحاجات دى عشان تبقى فاهم كويس والكلام

ده من مجرب وتبقى ماشى فى الكلية على نور




يلا ركز كده وصحصح معايا ..

اول حاجة : الكلية دى يا عم يعنى كبر دماغك وعيش فى الطناش ..

- الكلمة دى سمعتها كتير وكنت فاكر زيك بالظبط ان الجامعه يعنى طناش وتكبير دماغ وخروج ولف اينعم انت عديت الثانوى بهمه وقرفه بس مش
معنى كده ان الكلية زى ما بتسمع من ناس كتير , فالكلية حتقابل وحتصاحب ناس كتيرة اشكال وانواع حتلاقى الكويس وحتلاقى الوحش بالعكس
ممكن تلاقى واحد كان صاحبك من وانتوا صغيرين وعارف ان الواد ده كويس جدا ومحترم جدا ووو..الخ وتتفاجئ بيه فى الكلية حاجة تانيه اعرف ساعتها
انه انضم للصحاب الغلط ونرجع تانى لموضوعنا وانا حاتكلم على نفسى انا عملت كده فى التيرم الاول مالكلية مع شوية مواد قالولى دى مش مشكله
دى مراجعه نهائية واشترى دماغك وكنت شارى دماغى فعلا من حاجات كتيرة وزى ما كنت باسمع فكك مالمواد دى طول السنة وقبل الامتحان
اشترى المراجعه النهائية وادخل بيها الامتحان وحتنجح وتجيب تقدير وبيس لكن انا فعلا ماحسيتش بقيمه الوقت ده الا قبل الامتحان فعلا بيوم لقيت
نفسى مش فاهم اى حاجة وماعرفش ايه اللى بقراه ده وحاولت اجيب الكتاب واقرى اللى فيه لكن للاسف ماكانش فى وقت افهم حاجة وفى الاخر
بانت النتيجه اللى ذاكر مالاول نجح وعدى وجاب تقدير اما اللى اعتمدوا على المراجعه النهائية فانقسموا لصفين الاول عدى وجاب مقبول والباقى شال
وانا الحمد لله عديت منها بمقبول بس صدقنى والله انا لحد دلوقتى فاكر جملة قالتها دكتورة عندنا اكيد حتعرفها لما تخش هى دكتورة نشوى
دكتورة المحاسبة قالت جملة قبل الامتحان عمرى ما حنساها ( كنا قاعدين فى المدرج وكنا قبل الامتحان فقالتلنا ان دايما قبل الامتحان بتلاقى الطلاب
قبل الامتحان ماليين المدرج يعنى عشان الدكتور حيقول الامتحان بس ده مش بيحصل معايا انا الامتحان بقوله فكل محاضرة وانت اختار عايز تحضر
المحاضرة وتذاكر ولا تبقى مع القطيع ) فلك الاختيار عايز تحضر وتفهم مضمون المحاضرة وتبقى ماشى نضيف طول السنة ولا تبقى مع القطيع ,
واعرف كويس ان اللى بيعدى نضيف مالاول وبيمشى كويس بيفضل طول الـ4 سنين كده اما اللى بيبتديها طناش حيفضل كده ... بس الاهم انى عديت ..
فالمضمون من الكلام اللى فات ان اللى بيذاكر بيجيب وبيعدى وبالعكس لو ذاكرت او قريت او حتى حضرت المحاضرة حتدخل الامتحان وحتلاقيه
اسهل بمليون مرة من امتحانات الثانوى حتلاقى السؤال قدامك وانت عارفه وبكل سهوله بتجاوبه وساعه النتيجة حتلاقى نفسك جايب تقدير ان شاء
الله وباقل مجهود منك يعنى انت بس حتحضر المحاضرة وتفهم مضمونها وتعلم ورا الدكتور وقبل الامتحان حتلاقى نفسك عارف الامتحان حيكون ايه
من قبل ما تدخله ..

تانى حاجة : البنات ..

- اكيد حتقولى دول فاكهه الكلية ووو..الخ حقولك انت مضحوك عليك .. قابلت كتير داخليين الجامعه بقى عشان ( التظبيط ) وازاى يصاحبوا بنت ودى

اول حاجة بيفكروا فيها . وبعدين وبعد ما يصاحب حتلاقيهم عايشين بقى وحتلاقى فيلم روميو وجوليت الجزا التانى بيتكرر قدامك بس النهاية مش

حتكون ان الاتنين يموتوا النهاية حتكون انك حتدبلر زى الباشا اما بقى البنت حتعدى ونضيف كمان ..

طيب ليه حقولك بس الاول هات ودنك ( البنات دول بيذاكروا فى الخباثة فما تامنش لبنت فى حكاية المذاكرة دى نهائى )

الكلمة الجاية دى للبنات وكل الشباب يديروا وشهم ....

- بصي يا ستي :الجامعة دي معرض كبيييير قوي للهدوم شوية بدي على جينز على أستريتش على .. على ... المهم هقولك كلمة في ودنك بس بشرط قبل ما أقولها توعديني ما تزعليش .اتفقنا؟؟ (متخليش نفسك فرجة للي يسوا واللي ميسواش ) لأن مفيش شاب هيبصلك نظرة بريئة أنا شايف كام بنت نفسهم يطبقوا في زمارة رقبتي بس إحنا اتفقنا من الأول إن مفيش زعل ..





الحاجة التالته : نصايح الاكبر منك ..

- حتسمع اللى يقولك ما تذاكرش غير المادة دى والمادة دى اما بقى المادة دى ذاكرها قبل الامتحان بشهر والماده دى قبليها اسبوع والمادة بقى

قبليها بيوم مالمراجعه النهائية اعرف بقى منى ان ده مجرد تخاريف ولو حد مشى بالكلام ده وعدى نضيف فيعرف كويس انه عدى عشان دعا الوالدين

مش اكتر .. الكلية معادله بسيطه حتحضر وتعرف مضمون المحاضرة وحتروح تذاكرها حتلاقى نفسك مخلصها قبل الامتحان بمذاكره ساعه ومن

غير مضمون وحتدخل الامتحان وانت بايدك معلم على اسئلة عارف انها حتيجى وحتدخل وحتلاقيها فعلا وحتجاوبها بكلام الدكتور اللى اخدته فى

المحاضرة وحتجيب تقدير امتياز بكل بساطه وبس كده ..




خلاص اديك عرفت معظم الافكار اللى اكيد اتقالتلك او حاتتقالتلك ويا رب تكونوا استفدتوا منها .


ندخل فى التقيل بقى وهو الاسئلة الشائعه :..

ملحوظة : عشان الموضوع يبقى متكامل انا كتبت برضه عن النظام القديم الخاص بالانتساب وكمان لان فى كلام انه ممكن يرجعوه تانى وكمان عشان يكون الموضوع متكامل وماسيبتش حاجة ماتكلمتش عنها ..

1- ايه الفرق بين الانتساب الموجه والانتظام .؟

- هو يعتبر مافيش فرق غير فالفلوس انها بتكون زيادة عن الانتظام يعنى الانتساب بيدفعوا 500 والانتظام 150 فى السنة بس اما غير كده فيعتبر مافيش فرق بينهم ..

2- ازاى اقدم فكلية التجارة .؟

- فى الاول انت حتكتب فى التنسيق وتختار كلية التجارة وبعد مالنتيجه تظهر حتروح الكلية وتروح مكتب شئون الطلب عشان تكمل القيد فالكلية ولازم يكون معاك ساعتها ..

1- شهادة الثانوية الاصلية بتاعتك اللى بتستلمها مالمدرسة الثانوية اللى كنت فيها ..
2- شهاده الميلاد واهم حاجة تكون كوووووووووومبيوتر ..
3- ورقة نتيجة التنسيق اللى حتطبعها من عالنت من موقع التعليم العالى ..
4- 6 صور وحاول تكتب اسمك عليهم عشان ما يضيعوش ..
5- استمارة 2 جند ودى حتجيبها من مديرية الامن هى بحوالى جنية ..

بعد ما بتاخد الحاجات دي بتحطها في ظرف بلاستيك من ابو كبسولة دا (ولازم يبقي بكبسولة وماتسألنيش ليه!) وتقدمه للراجل اللي قاعد في الشئون .

بعد مابيتأكد من بياناتك ويطابق اسمك اللي في بطاقة الترشيح بالاسم الموجود عنده في الكشوفات اللي جايه من مكتب التنسيق مباشرة بيقوم

مديك بطاقة الترشيح تاني ويقولك معا السلامة خلاص كدا ورقك خلص والف مبروك ..

- لو عايز تعرف اكتر من هنا ..

3-السؤال المهم بقي اللي بيتكرر كتير جدااااا - ازاي اخش تجارة انجليش ؟

النظام القديم : اما التنسيق بيتفتح (مرحلة اولي طبعا) حضرتك بتكتب في الرغبات بتاعتك تجارة كذا المهم انها تكون انتظام وبس . بعد مابتجيلك نتيجة التنسيق بتتبع الخطوات السابقة في السؤال رقم 2 بالظبط .. بس الفرق ان كل اللي بيحصل انك بتروح بقي لشئون الطلبة بتوع انجليش وتقولهم انا عايز اسحب ملف شعبة .. دا بـ 150 جنيه .. طبعا انتا مش هاتديله الـ 150 جنيه وش كدا هو هايديك اذن دفع تروح تدفعه في خزنة الكلية والراجل بتاع الخزنة هايديك وصل . هاتاخده وتديه لنفس الراجل بتاع الشئون هايقوم مديك الملف . هاتملاه وتظبط حالك وتستني اما التنسيق الداخلى بتاع تجارة انجليش يظهر . وساعتها نقولك الف مبروك ..

النظام الحالى : وانت بتختار الرغبات بتاعتك بتختار تجارة انجليزى " والفرق بيكون فالمصاريف بتكون ازيد ودرجة مادة الانجليزى " ..



4- هو فى شروط معينة عشان اخش تجارة انجليش ولا ايه ؟

- اكيد طبعا فيه . هيا سداح مداح كدا ؟! . الشروط واضحة زي الشمس عشان ماحدش ييجي يناقشنى فيها تاني :

أ- مجموع الثانوية العامة يكون مجموع انتظام (يعني كلمة انتساب موجه دي ماشوفهاش خالص)
ب- مجموع مادة الانجليش لا تقل عن 40 من 50 (80% من المجموع الكلي للمادة)

ملحوظة بسيطه التجارة الانجليش فى المصاريف بتختلف عن العربى ( مصاريف التجارة الانجليش هى 3750 جنية ) ..

5- انا سمعت ان فيه حاجة اسمها المجموع الاعتبارى والتنسيق الداخلى .. ايه وجع الدماغ دا ياعم ؟

لا وجع دماغ ولا حاجة . عشان العملية ماتبقاش سداح ومداح وكل من هب ودب يخش تجارة انجليش وعشان ادارة الكلية تضمن ان الناس اللي هاتدرس في تجارة انجليش دول يكونوا قدها بيبدأوا يعملوا عملية تصفية للناس اللي متقدمة . والتصفية دي بتبقي من خلال حاجة اسمها المجموع الاعتبارى واللي بدوره بيؤدى للتنسيق الداخلى

سامع حد دلوقتى بيقولى ان برده مافهمتش حاجة ! .. اقولك ياعم الحاج

دلوقتى المجموع الاعتبارى دا ما هو الا عبارة عن :

مجموع الثانوية العامة (بدون المستوى الرفيع) + مادة الانجليش + المستوى الرفيع في مادة الانجليش اذا وجدت
طب يعني ايه اذا وجدت دي ؟ . يعني اذا كانت موجودة خير وبركة . مش موجودة يبقي دا مش هايشكل مشكلة في التقديم . بس دا بيديك ميزة على غيرك في ان الكام درجة بتوع المستوى دول بيرفعوك في مجموعك الاعتبارى

طب والتنسيق الداخلى دا ايه نظامه ؟ .. بعد ما ادارة الكلية بتستلم طلبات الطلبة في الالتحاق بتجارة انجليش بيعملوا عملية غربلة او تصفية للناس اللي متقدمة . بحيث انهم يقبلوا عدد معين هما محددينه طبقا لكثافة الكلية .. والسنة اللى فاتت كان عدد الطلاب 160 طالب . وعشان كدا هما اخدوا اعلي 160 مجموع اعتبارى متقدملهم (كمثال مش اكتر) ..

6- طب وتجارة فرنساوى دي ايه نظامها ؟

تجارة فرنساوى موجودة فى كلية التجارة جامعة عين شمس ومش موجودة في اي حتة تانية غيرها . وشروط قبولها زي تجارة انجليش بس شيل انجليش وحط فرنساوى ..



7- هل فيه شروط معينة عشان التحق بتجارة عربى ولا هيا زيطة ؟

- لا هى زيطة والحمد لله . لإنك اصلا اول مابتقدم انتا كدا اولريدي بتقدم في شعبة عربي . لو عايز بقي تتخصص في انجليش او فرنساوى دا بيبقالوا كلام تاني زي ماقولنا قبل كدا ..

8- بالنسبة للتعليم المفتوح ايه نظامه ؟

- بالنسبة للاوراق المطلوبه فهو زى التجارة العادية بالظبط بس بتزود عليهم موافقه من جهه العمل لو كان اللى بيقدم عامل ..

- لو طالب ثانوى بتختار فالرغبات " تعليم مفتوح كلية التجارة " ..

9- ايه حوار مكافاة التفوق دى ؟

- دى مكافاة بتكون 84 جنية بتاخدهم مالخزينة بتاعه الكلية ودى بتكون للى جايبين فى الثانوية العامه 80% وانت طالع وبتفضل شغاله لو جيبت تقدير جيد جدا حتاخدها برضه اما لو جيبت امتياز فحتاخد 120 جنية ..

10- ايه هى طيب الاقسام اللى ممكن اتخصص فيها فالتجارة ؟

- من حيث الاقسام فالاقسام كتيرة وهما :

1- قسم المحاسبة : " او كما يقال قسم الشعب " وهو اشهر الاقسام واللى بيأهلك تكون محاسب لانك بتدرس كل انواع المحاسبة ..

للمتابعه اكتر اضغط هنا

2- قسم ادارة الاعمال : وهو من حيث الشهره فيعتبر تانى اشهر الاقسام وبتدرس فيه البيزنس ..

للمتابعه اكتر اضغط هنا
× قسم ادارة الاعمال | .:: حملة اعرف شعبتك ::. ‏

3- قسم الاقتصاد : وبيأهلك تكون حاجات كتير منها خبير اقتصادى او تشتغل فالبورصة او فالبحوث الاقتصادية فأى شركة وكده ..

للمتابعه اكتر اضغط هنا
× قسم الاقتصاد | .:: حملة اعرف شعبتك ::.

4- قسم المالية العامة " قسم الدراسات المالية والجمركية " : وده بيأهلك للعمل فى مجال الضرائب والرقابة المالية للعمل فى وزارة المالية والجهاز المركى للمحاسبات ..

للمتابعه اكتر اضغط هنا
× قسم الدراسات المالية والجمركية | .:: حملة اعرف شعبتك ::.

5- قسم العلوم السياسية : يعنى معروف من اسمه ..

6- قسم الاحصاء الوصفى : وده بيأهلك تشتغل فى البنوك والمؤسسات المالية المختلفة، المنشآت التجارية والصناعية، وبرضه فى المؤسسات العلاجية أو الصحية لتحليل بيانات المرضى وفى المؤسسات التعليمية والبحثية المختلقة ..

للمتابعه اكتر اضغط هنا
× قسم الاحصاء التطبيقي | .:: حملة اعرف شعبتك ::.

7- قسم نظم المعلومات : وده مش موجود عندنا لسه ..

11- ايه هو نظام السمر اكزام ده ؟

- ده نظام المفروض حيتطبق من السنة دى المفروض , وهو لو حد نجح بس معاه مادتين بدل ما يشيلهم للسنة الجديدة لا ده حيمتحنهم فشهر 9 فنفس السنة الدراسية ..

10- طيب والسمر كورس ده ؟

- مش عندنا , بس مضمونه فالاغلب انك لو شايل كل المواد اللى عليك فبتمتحنها فالاغلب فشهر 10 ويا سبع يا ضبع ..

10- طيب المكاتب والحاجات دى ؟

- زى مكاتب الثانوى عادى بس مانصحكش تعتمد عليها , لان الافضل طبعا انك تحضر محاضرتك , تكتبر الكلام اللى الدكتور بيقوله , تشوفه فالكتاب وتخطط وراه وعالحاجات المهمه , ساعتها مش حتحتاج تلجأ نهائى للمكاتب , واحيانا كتير كمان بيبقوا حاطين ورق من السنين اللى فاتت فانت فاكس وخليك فالسليم عشان ماترجعش تندم او على الاقل تحضر المحاضرة وتعرف كلام الدكتور وتفهمه وبعدين يا سيدى شوف اللى انت عايزه ان شالله حتى تشترى ورق الدنيا كلها ..

10- والانشطه بتاعه الكلية والاسر والحاجات دى ؟

- دى بقى عايزالها موضوع لوحده عشان اشرح الانشطه اللى بتكون فالكلية , هى الانشطه كتيرة جدا جدا وانا بانصح الجميع بانه يكون فعال ويشارك فالانشطه اللى بتتعمل لان زى ماحيتقالك فأول محاضرة تحضرها ان الكلية دى احسن فترة فحياتك وهى الفترة اللى بتبنى فيها شخصيتك فماتضيعهاش عالفاضى او بعد ماتتخرج تحس انك ماستغلتهاش او ماعملتش فيها حاجة او عديت عالفاضى ..

12- طيب ما تكلمنى عن التقديرات فى الكلية ؟

بص يا سيدى التقديرات بتكون من الصغير للكبير كده

1- ضعيف جدا : من 0 لـ35% ( يا رب ما يكتبهالك ) ..
2- ضعيف : من 35% لـ50% ( ويبعدك عن دى كمان ) ..
3- مقبول : من 50% لـ65% ( ويسترها معاك فدى ) ..
4- جيد : من 65% لـ80% ( ويكتبهالك يا رب ) ..
5- جيد جدا : من 80% لـ90% ( وتذاكر وتنولها ) ..
6- امتياز : من 90% وانت طالع ( مش عايز أأفور ) ..

كام ملحوظة بقى صغيرة كده على التقديرات دي :

1- التقدير للمجموع الكلى مابيتحسبش الا في آخر السنة (يعني الترم التاني)
2- اللي بيشيل مادة واحده بيتكتبله في التقدير العام (منقول بمادة)
3- اللي بيشيل مادتين بيتكتبله في التقدير العام (منقول بمادتين)
4- اللي بيشيل اكتر من مادتين بيكتبله في التقدير العام (باقى للإعادة)
5- لو انتا شايل مادة واحده
بس مجموعك جايب الجيد مش هايتحسبلك التقدير وهايتكتب منقول بمادة
6- بالنسبة للسنة الاخيره فانت بتطلع بتقدير مقبول او جيد او جيد جدا او جيد جدا مع مرتبه الشرف او امتياز او امتياز مع مرتبه الشرف ..

بالنسبة بقى لدرجات الرأفة : فانت حتسمع كلام كتير ورغى كتير فى الموضوع بس الكلام اللى اعرفه واللى ان شاء الله اكيد انهم 28 درجة بيتخصموا

من مواد تانيه وبيتضافوا عشان تترفع فمواد اللى شايليها يعنى لو جايب فماده ضعيف فدرجات الرافه حترفعك وده بيكون اخر السنة وممكن توصل انك

تبقى جايب فاربع مواد ضعيف وتترفع فيهم كلهم يعنى لو ناقص فكل ماده من الاربعه 7 درجات على المقبول حتترفع فيهم كلهم وتنجح او مثلا شايل

3 ضعيف وناقص فكل واحده 9 درجات من المقبول فحتنجح فيهم كلهم وتجيب مقبول اما بقى لو معاك 3 مواد مثلا ودرجات الرافه يا دوب تعديك من اتنين

فكده حتعدى من اتنين وتشيل التالته للسنة اللى بعديها وهكذا .. بس خلى بالك لو جيبت ضعيف جدا فمعاك ربنا معناها انك شايل الماده خلاص للسنة

اللى بعديها لان مافيش نظام السمر كورس فكليتنا ..



كلمة اخيرة حاول تنقى اللى تصاحبه فالكلية واعرف الكويس وصاحبه وسيبك مالوحش لانه حيكون بخسارة عليك وحتندم على كده .. المحاضرات

حاول تحضرها مش بقولك حتى ركز فكل كلمه لكن احضرها على الاقل اعرف بتتكلم على ايه عشان حتندم والله .. المذاكرة تكون اول باول حتى ولو

ساعه بس فاليوم ذاكر فيها اللى انت عايزها وسيبك ماللى يقولك مراجعه نهائية وكلام فاضى ماشى زاكر واعرف منهجك طول السنة واشترى

المراجعه دى حتخلصها بالظبط فساعه وحتكون عارف كل اللى فيها بس الفرق بينك وبين غيرك اللى ما ذاكرش انه حيزنق نفسه وحيكون مش عارف

حاجة .. بالنسبة لموضوع البنات فخلى الاولوية ليك يا ريس فالمذاكره الاول واعرف كويس مهما البنت قالتلك انها برضه بتدح من غير ماتقولك ..

· آخر كلمتين بقا علشان أنا حاسس أني بقيت غتت ... بقلكم إيه اسمحولي أنصحكم نصيحة لوجه الله ... الرسول (ص) بيقول كلام حلو ومهم قوي عن الشباب ..عارفين بيقول إيه " لن تزولا قدما عبد يوم القيامة حتى يُسأل عن أربع" ... ومنها عن "شبابه فيما أبلاه؟ " يعني كل واحد فينا ربنا هيسأله عن فترة الجامعة دي عمل فيها إيه .. طبعا دي كل واحد فينا هيجاوب عليها لوحده .. ودي بالذات مفيهاش غشّّ!!

اللهم قد بلغت .. اللهم فاشهد ..


ملحوظة : انا سيبت الحاجات الخاصه بالانتساب الموجه لان فى كلام على انه احتمال يرجعوه تانى ..

واى حد عايز اى استفسار او طلب اطلب هنا فى الموضوع وانا بالخدمه

 

..

محمد الشبكشى

Bet7biny@yahoo.com